Ka boinichtn soinda khennt gesunk di altn kantzü, ma lai di laüt von kontrade håmse gesunk azpi biar, ombromm di soldàn håm gebruntlt un håm khött ke da beratn gest kontro in belesan, asó, auz baz dar Adeste Fidelis soinda khennt gesunk åndre kantzüla åna vèrt.

Di tang soin vorgånnt gemischt inn in snea, un in di stèll abas hattma nemear geredet von altn Göttar, Odino odar Loki, un von gaistar, boda dar kontzilio vo Tria hatt gehatt inngespèrrt vor hèrta in Nusstal, odar von arbatn in di baitn lentar vodar bèlt, ma hèrta lai von kriage boden iz gest vortgetrakk di pestn puam, boda hebatn gemak arbatn ummar afte beng vodar gåntzan bèlt. Un azzta epparummadar iz gestorbet afte arbat iz sichar nètt gest azpi valln in kriage: arbatn hattma gemucht zo zügla au di khindar, anvetze in kriage saitma gestorbet ummenicht; asó balda di karabinìarn odar dar månn von kamou soin gånt inn in a par a haus zo khöda ke ummaz iz khennt getöatet, birsar baz allz izta gest dar zorn.

In stall von Nappa, in timpl liacht vodar lantèrn hattma ågeschauget in fòldjo, boda hatt gekhostet zbuantzekh zenteseme, gehoazt: La Guerra Italiana, cronistoria illustrata degli avvenimenti gedrukht vo Sonzogno vo Milån. Sichar lesan zèrte sachandar da, boda ’z kriage iz gest, makma khön, afte tür von haus, hattz boll auzgeschauget stråmbat un malamentar zo gloaba, ma allz ummaz soinda gest laüt boda håm gegloabet az sai allz bar bazta iz gest geschribet affon sèll fòldjo.

Aftna sait hattma gesek an soldàdo hergerichtet azpi vor draitausankh djar in kriage vo Troia, pittnar rüst pitt aisan, an èlmo affon khopf, un insinamai aisrane gomaschan, in arm hattar gehaltet an söttan lången spitzstèkh azpi di crotschati. Aftna åndra sait hattma gelest ke: «In a hütt gevånk von alpìn iztada gest geschribet atz belesch: «ziaget da, ke untar iztada ’z gèlt» un anvetze untar iztada gest a granatt. Un no: «Di spitzstèkhan gedjukht abe von roplé porn durch allz daz sèll bosa vennen.» (37. / continua)