Nasciü tl 2017 él sëgn jü online cun suzes le portal “Wikipedia Ladina”. I contignüs dla Wikipedia ladina é scric ti idioms ladins y dess insciö testimonié n lingaz y na cultura ladina vis. Le proiet é gnü coordiné da Susy Rottonara adöm cun i mëmbri dl Comité de sostëgn, le scritur Roland Verra y le mëmber dl diretif de Wikimedia Italia Gian Francesco Esposito.

Por l’assessur por la scora y cultura ladina Daniel Alfreider é chësc n vare important por le grup linguistich ladin. “Wikipedia é n portal che vëgn consulté ion por ciaré do val’ o se informé y che al é sëgn online ince na verjiun por ladin renforzëia nosta identité y nosta cultura. Al é n stromënt che pó dessigü ince gní adoré te scora”, insciö Alfreider. La combinaziun dl’adoranza de internet y dla creaziun de contignüs ladins é de valüta ince por le dagní por ti pité a düc i interessá informaziuns tl lingaz dla uma sön le web, insciö Alfreider.

La Wikipedia ladina contëgn informaziuns desvalies sön tematiches de interes general (p.e. geografia, storia, biologia) y sön la storia y cultura ladina tl spezifich. Indöt él 1880 plates, a chëres che 441 colaboradësses y colaboradus á laoré para. Al vëgn insciö pité la poscibilité de na partezipaziun intlusiva a livel interladin da pert de düc i interessá a dé ite contignüs desvalis. Wikipedia é na enziclopedia lëdia a chëra che al po tó pert düc i interessá cun le laur volontar, insciö che al po gní arjunt l’obietif de na colaboraziun dër ampla a livel cultural sciöche proiet interladin che se svilupará sön deplü agn.